Македонскиот премиер, Зоран Заев, и неговиот колега премиерот на Република Бугарија, Бојко Борисов, го потпишаа Договорот за добрососедство, пријателство и соработка меѓу двете земји.
Во своето обраќање македонскиот премиер изјави дека договорот и дава позитивен сигнал на меѓународната заедница за стабилизација на регионот.
„Договорот покажува дека таму каде што има политичка волја прашањата ќе се решат. Македонија и Бугарија направија историски чекор напред. Отворивме пат за стабилност и развој за двете држави и за балканскиот регион. Овој договор е взаемен успех и придонес кон политичка стабилизација. Влада на Република Македонија се определи да води политики на решавање. Во владата на Република Бугарија видовме конструктивен партнер со исти цели“, изјави Заев.
Тој додаде дека договорот е пример како долгогодишна кочница може да стане мотор за поврзување.
„Овој договор е значајна порака до ЕУ и НАТО дека земјите од регионот имаат политичко раководство кое гради мостови. Балканот и Југоисточна Европа се однесуваат европски и ги заслужуваат европски и атлански перспективи. Република Бугарија е уште поголем пријател на Македонија. Мојот народ денеска има право да биде среќен поради овој чекор.“, рече премиерот Заев.
Можевме да не го потпишеме договорот, со години наназад не го потпишувавме, рече премиерот на Република Бугарија, Бојко Борисов.
Без директиви постигнавме договор, мирот и добрососедството се поважни од се друго, изјави Брисов.
„ Нашите тимови работеа неколку месеци активно за да имаме потпишување на договор со толку убаво име – добросоедство. Двата меморандуми се исклучително важни и за вас и за нас бидејќи транспортниот коридор број 8 е врската која што го поврзува целиот Балкан. Овој транспортен коридор овозможува излез не само на север и југ туку и спојување на секоја друга земја од Балканот да соработува со друга држава“, рече Борисов.
Договорот и покажува на Европската унија дека е возможен мир на Балканот, рече тој.
„Овој дoговор има смисла бидејќи на ЕУ и покажува дека на немирниот Балкан каде пред само 20 години имаше толкаво крвопролевање и ужаси врз десетици илјади луѓе, сега ќе ја видите реакцијата која ќе биде позитивна. За десет години резултати од денешната средба ќе бидат видливи за двете држави“, додаде бугарскиот премиер.
По потпишувањето на договорот, тој треба да биде ратификуван во Парламентот.
Договорот меѓу другото предвидува Македонија да може да се грижи за македонското малцинство во Бугарија само во согласност со билатералните и мултилатералните договори чии потписници се Скопје и Софија. Натаму стои дека двете држави имаат право да ги заштитуваат правата и интересите на своите државјани на територијата на другата страна.
Во точката 5 од членот 11 пишува дека Македонија потврдува дека ништо од нејзиниот Устав не може и не треба да толкува дека претставува или некогаш ќе претставува основа за мешање во внатрешните работи на Бугарија, со цел заштита на статусот и правата на лица, кон не се државјани на Македонија.
Во договорот стои дека Бугарија ќе ѝ помогне на земјата за влез во ЕУ и НАТО, без поставување услови. Член од договорот предвидува да се формира заедничка комисија кој треба да придонесе за објективно и научно толкување на историски настани и дека Бугарија и Македонија ќе организираат и заедничко чествување на историски личности и настани.
Договорот треба да овозможува подобра економска соработка, царински и гранични олеснувања, соработка во областа на туризмот, заеднички инвестиции, развој на транспортот и патната инфраструктура. Двете држави ќе поттикнуваат и соработка во областа на културата, образованието, здравството, спортот.
Во текот на денот македонските министри и нивните бугарски колеги ќе имаат билатерални средби. Предвидено е и потпишување на неколку меморандуми за соработка.
За утре, 2 август, кога се одбележува националниот празник Илинден, предвидено е заедничко чествување во црквата Свети Спас во Скопје, каде се наоѓа гробот на Гоце Делчев.
За време на посетата на Македонија, Борисов ќе се сретне со претседателот Ѓорге Иванов и со претседателот на Собранието, Талат Џафери.