Дивергентните ставови во однос на промената на Уставот на македонската и грчката страна ја комплицираат завршницата на преговорите за спорот и ги минимизираат шансите да се постигне договор пред Самитот на НАТО и почетокот на пристапните преговори со Европската Унија.

За финален договор за тридеценискиот спор со кој би се отворила евроатлантската интеграција на Македонија остануваат помалку од два месеци – период во кој двете страни ќе се обидат да најдат излез од ќорсокакот.

Главен проблем е инсистирањето на Грција, Македонија да го промени Уставот со што новото договорено име би се користело и за  домашна употреба, со што не се согласува македонската позиција. Атина инсистира дека ерга омнес примената на новото име мора да биде обезбедено и со промена на Уставот. Грција не се согласува со промена на Уставот да се гарантира дека новото име ќе биде за меѓународна употреба – унилатерална и билатерална, а за целосна имплементација да се организира рефрендум евентуално кога ќе дојде време за приклучување кон Европската унија.

Инсистирањето на грчката страна за отворање и менување на Уставот на Република Македонија, со толкување дека правниот термин „ерга омнес“ означува дека евентуално новото договорено име за државата би требало да се применува и за внатрешна употреба, стручната, па и пошироката јавност во Македонија ги доживува како нова уцена на Грција. Во меѓународното право е јасно дефинирано дека терминот ерга омнес означува употреба кон сите држави во меѓународните односи, а не и за внатрешна употреба, коментира експертската јавност.

Во меѓувреме продолжуваат интензивните преговори меѓу министерот за надворешни работи Димитров со својот грчки колега Коѕијас, прво во Сунио на состанокот на  Вишеград 4 и Балкан 4, на 10 и 11 мај, а потоа на 12 мај во Атина со средба со посредникот Нимиц.

Само една недела подоцна во Софија на 17 мај, на Самитот ЕУ – Западен Балкан ќе се сретнат премиерите Заев и Ципрас, на која се очекува двајцата лидери да се обидат да преземат политичката одлука за решение за спорот.

Но, дипломатски извори за НОВА ТВ коментираат дека шансите за договор се мали, поради грчкото инсистирање за промена на Уставот.

Во неодамнешното телевизиско интервју, Никос Коцијас ја отфрли можноста да се најде решение до самитот на НАТО во јули, што ќе и  овозможи на Атина да даде согласност за покана за членство на Македонија. Коѕијас во истото интервју вели дека целата работа би требало да се заврши најрано на есен.

Во случај да не се постигне договор, грчкиот весник „То Вима“ пишува дека Атина ќе биде повикана да донесе одредени тешки одлуки, особено на Самитот на ЕУ на крајот од јуни.

„Тогаш, во услови на можни притисоци, ќе се утврди дали Атина ќе се согласи за доделување датум за отпочнување пристапни преговори на ПЈРМ со ЕУ, бидејќи Брисел и многу земји членки сакаат итно одново приближување со Западен Балкан, или ќе стави вето“, пишува „То Вима“ и додава дека на ниво на постојани претставници, Атина не била против препораката на комисијата за доделување датум за почеток на преговори.