Групата „Јавна Соба“ на социјалната мрежа Телеграм каде се објавуваат интимни фотографии и видеа на малолетни девојчиња од повеќе македонски градови го вклучи алармот кај институциите. Бирото за јавна безбедност од синоќа, по откривањето во јавноста, покрена истрага во која се очекува да се откријат администраторите и членовите на затворената група.
Техничкиот премиер Оливер Спасовски рече дека оваа група е новоформирана и за кратко успеала да дојде до голем број на членови.
„Од Бирото за јавна безбедност покрената е истрага. Излезено е Јавното обвинителство за наоѓање на администраторите и членовите на оваа група. Во исто време, сакам да апелирам до сите нас, до родителите, образовните институции за поголем надзор врз децата и навремено да се реагира и во семејствата и во улиштата“, рече Спасовски, кој додаде дека и порано имало вакви случаи што се расчистувале.
До сега нема ниедна пријава од родители на девојчињата за злоупотреба, потврди дополнителната заменичка министерка за труд и социјална политика, Санела Шкриjељ.
„Се координираме со МВР и со МОН. Упатувам апел до сите родители чии девојчи се изложени, да се обратат до Центрите за социјална работа, кои во соработка со МВР ќе постапуваат. Со МОН веќе договоривме стручните служби во училиштата да преземат мерки“, рече Шкриjељ.
Според информациите кои се споделуваат на интернет, дел од фотографиите се превземени од отворени профили, а дел биле препраќани преку приватни профили и имале порнографска содржина.
Како што објави Радио МОФ, вакви информации пристигнале до редакцијата, по што тие успеале да влезат во групата и откриле фрапантни податоци – групата постои околу еден месец, има над 7.400 членови, а зачленување оди преку испраќање приватни пораки, по што автоматски си дел од групата. За случајот веќе јавно проговореа и професорите.
„Институциите се на потег. Ова е аларм за сите нас – најмногу родителите, па училиштето и целата заедница. Пред очи ни се случува дегенерација на новата генерација млади и општ пад на моралот на сите нивоа“, алармира професорката Тамара Ќупева, која појасни што точно се случува во затворениот круг членови.
„Јавна соба“ е името на групата што деновиве се шири меѓу средношколците во Скопје и низ другите градови. Станува збор за група која е креирана на апликацијата Telegram. Комуникацијата е идентична на Вибер – комуникацијата. За неполни три дена се зачлениле повеќе од 7300 членови. Членовите на оваа група, во слободна, отворена ( вулгарна) комуникација со другите членови, споделуваат и коментираат експлицитни фотографии од девојчиња од различни градови. Тоа се најчесто оригинални порнографски слики и видеа. Дел од тие фотографии се лажни, но се поврзуваат со конкретни имиња, така што девојчето – жртва нема можност да докаже дека таа не е всушност девојката на фотографијата“, напиша меѓу другото професорката.
Таа нагласи дека ова е аларм за сите нас – најмногу родителите, па училиштето и целата заедница. Пред очи ни се случува дегенерација на новата генерација млади и општ пад на моралот на сите нивоа.
„Ова е крајно загрижувачка, сериозна опомена дека децата, воспитанието и нивното образование се најзапоставените приоритети. Очигледно е дека во нашата лична, секојдневна и поширока, општествена агенда – тие дефинитивно се на последното место“, напиша професорката.