СДСМ бара Коце Трајановски веднаш да преземе мерки против директорот на Јавното претпријатие „Водовод и канализација“, поради како што велат, невалидната диплома за завршено образвание.
„Коце Трајановски до сега одамна требаше или да го смени или да го суспендира директорот Александар Атанасов. Вистината е дека Коце Трајановски ја нема ниту силата, ниту храброста за да го направи тоа, затоа што тој не е вистинскиот градоначалник на Скопје. Вистинскиот градоначалник Никола Груевски е во роднински врски со Атанасов и тој не дозволува негова смена“, изјави денеска на прес-конференција Дамјан Манчевски од СДСМ.
Според него, исто како и во Собранието на Македонија, Никола Груевски воведува целосно беззаконие и во градот Скопје.
„Не важат правила, не важат закони, не важи Устав. Ги повикуваме сите чесни членови на ВМРО-ДПМНЕ да се одважат и да се охрабрат. Да ги почитуваат законите. Заедно да го спречиме хаосот и беззаконието преку кои Никола Груевски единствено го гледа својот единствен спас. Веднаш потоа да одиме на локални избори, каде граѓаните на Скопје ќе добијат вистински градоначалник“, рече Манчевски.