Претседателството на МАНУ е длабоко загрижено за актуелната политичка состојба во земјата, за долгата криза и продлабочувањето на меѓупартиските тензии во постизборниот период. Сето ова, според МАНУ, води кон понатамошно комплицирање на состојбите и продлабочување на поделбите меѓу граѓаните на Македонија. Граѓаните се наоѓаат во голема неизвесност за блиската иднина.
– Претседателството на МАНУ повторно укажува дека за надминување на кризата и враќање на земјата на патот на правната држава, ефективно функционирање на независни судски и други институции, владеење на правото и ослободување и раздвижување на евроатлантските интеграциски процеси, најголема одговорност носат политичките партии и нивните раководства, наведува МАНУ во дописот.
МАНУ смета дека кризата мора да заврши и да завршат сите обиди за поттикнување омраза, непријателство и закани за пресметки врз национална, етничка или политичка основа. Сите политички партии тоа мораат да го осудат но и сите медиуми. Потребна е атмосфера на конструктивен, обединувачки и плодотворен дијалог.
– За содржината и уставната заснованост на секое понудено законско решение во оваа сфера, МАНУ ќе се произнесе тогаш кога таквите решенија ќе бидат доставени на јавен увид и расправа. МАНУ очекува сите политички субјекти и државни институции да останат на рамништето на својата политичка и правна одговорност, воздржувајќи се од преземање какви било активности во правец на влошување на политичката криза, и својата декларирана определба, да им служат на народот, да ја изразат низ започнување неодложен меѓусебен отворен и јавен дијалог за стабилизација, демократски развој и забрзување на евроатлантските интеграции на Република Македонија, пишува Претседателството на МАНУ.