Енди Мареј пристигна во Њујорк за претстојниот турнир Ју-Ес опен. Но, она што се поставува како дилема е дали колкот на британскиот тенисер ќе ги издржи напорните тренинзи, а со тоа и дали ќе биде во состојба да настапи на завршниот гренслем во сезоната.
Најдобриот светски тенисер за 2016 година е без официјален меч по поразот во четврт-финалето на Вимблдон од Сем Квери. Причина за тоа се болките во колкот што се посилно почнаа да притискаат поради што беше принуден да го откаже учеството на Мастерсите во Монтреал и во Синсинати. Како последица, пак, на отсуствата дојде и падот од лидерската позиција на АТП листата што од понеделник ја презема Рафаел Надал.
Медиумите во Велика Британија ја нагласуваат желбата на Мареј да заигра на терените на Флешинг Медоу за што ги жртвуваше настапите на турнирите во Монтреал и во Синсинати. Меѓутоа истовремено и се прашуваат дали повредениот колк ќе може да издржи.
Американскиот гренслем почнува на 28 август и ќе трае до 10 септември. Единствената титула, засега, во „Големото јаболко“, Мареј ја освои во 2012 година.