Министерот за правда најавува промени во текстот на Изборниот законик во насока на подобрувања. Тој вели дека начелно е постигната согласност меѓу големите четири политички партии. А, по одморите или на средина на август, министерот очекува законот да биде изгласан во Собранието.

-Изборниот законик е комплициран за донесување и секогаш сме го носеле со консензус. Во овој момент сè уште се работи на тој текст. Постои предлог во Собранието, потпишан од неколку пратеници коориднаторите на четирите најголеми партии, но она што можам да го кажам е дека тоа не значи дека во таа форма конечно ќе биде донесен. Има уште време, иако не премногу, но верувам дека по одморите ќе биде донесен, рече Маричиќ.

Тој посочи дека идејата е во законот да се имплементираат сите потребни препораки на ОБСЕ/ОДИХР, и да се направат подобрувања на процесот, во интерес на демократизација на изборите, и поголемо учество на граѓаните.

Темата за изборниот законик меѓу партиите е отворена неколку месеци.

-Во оној момент кога ќе имаме законски текст кој ќе биде усогласен, и за кој ќе сметаме дека ќе биде подобар од овој кој што е во моментов во Собранието, ќе биде повторно предложен и тој ќе биде изгласан. Меѓутоа во секој случај добро е да има измени на Изборниот законик, во смисла на препораките на ОБСЕ пред се, но и некои други решенија кои се битни за изборниот процес пред да одиме на избори во октомври, рече Маричиќ.