На предлог на Министерството за економија, Владата на денешната седница донесе одлука за посебни услови според кои ќе се определува највисоката трговска маржа на пазарот со електрична енергија.
Како што денеска на прес-конференција информираше министерот за економија Крешник Бектеши, највисоката трговска маржа на електричната енергија за сите трговски друштва и трговци поединци кои вршат трговија на пазарот со електрична енергија на големо и на мало се утврдува во висина најмногу до 10 отсто.
„Трговската маржа за учесниците на пазарот на електрична енергија ќе се пресметува на просечната цена на електрична енергија за мегават часови од Унгарската берза за електрична енергија (HUPX) на дневно односно часовно ниво, на цената на електрична енергија за мегават часови во билатералните договори и цената на електрична енергија за мегават часови во договорите за снабдување со електрична енергија. Одлуката ќе се применува до 15 април следната година“, рече министерот. (Р.Н.)