Новак Ѓоковиќ и Рафаел Надал ќе играат во финалето на Австралија опен. До седмиот меч за седма титула во Мелбурн, српскиот тенисер стигна по триумфот над Лукас Пуј со 6:0, 6:2, 6:2 за само 83 минути игра. Односот на силите на терен најдобро го отсликува фактот дека Французинот освои прв гем во мечот на почетокот на вториот сет.
Ѓоковиќ призна дека дуелот со Шпанецот го обезбедил преку една од најдобрите партии во кариерата и притоа ја истакна желбата за реприза на исходот од 2012 година.
„Ќе поинаку за разлика од пред седум години бидејќи правилата за петти сет се променети. Тогаш игравме речиси шест часа што беше едно од најголемите искуства за мене. Но, се надевам дека исходот ќе биде ист“, рече Ѓоковиќ кој порача дека сигурно би купил билет за спектаклот со Надал кога би бил во улога на тениски фан.
Со евентуална победа во недела наутро, Ѓоковиќ ќе биде рекордер по бројот на освоени титули на Австралија опен и би ги минал Рој Емерсон и Роџер Федерер.
„Против Пуј го одиграв еден од најдобрите мечеви во кариерата. Се функционираше како што посакував“, додаде првиот носител на гренслемот.
Рафаел Надал, пак, во полуфиналето го елиминира Стефанос Циципас со 6:2, 6:4, 6:0 за негово петто финале во кариетата на Австралија опен што се игра за награден фонд од 29,6 милиони долари.
За титулата кај дамите ќе играат чешката тенисерка Петра Квитова и Јапонката Наоми Осака. Квитова во полуфиналето ја совлада Даниел Роуз Колинс од САД со 7:6, 6:0, а Осака беше подобра од Каролина Плишкова од Чешка со 6:2, 4:6, 6:4.