Илон Маск се назначи себеси за извршен директор на Твитер и го распушти одборот на директори, објавија вчера извори од компанијата, додека вработените стравуваат од најавените отпуштањаспоред новото реструктуирање кое би можело да таргетира до една четвртина од персоналот.
„Вашингтон пост“ вчера објави дека тимот на Маск разговарал за отпуштање на 25 отсто од работната сила на компанијата во првиот круг на отпуштања.
Најавата за отпуштања доаѓа откако технолошкиот милијардер го купи Твитер минатата недела за фантастични 44 милијарди. Познатиот адвокат Алекс Спиро, долгогодишен правен застапник на Маск, ги водел разговорите за претстојните укинувања на работните места.
По купувањето на Твитер Маск брзо презеде контрола, отпуштајќи ги главните директори вклучително и главниот извршен директор, директорот за финансии и шефот за правни прашања и политика.
Маск, исто така, го распушти одборот на директори на Твитер и се назначи себеси за единствен член на одборот, беше откриено вчера по поднесените документи до Комисијата за хартии од вредност. Маск подоцна во твит рече дека распуштањето на одборот било „само привремено“.
Маск ја смени и својата биографија на Твитер во „Chief Twit“, алудирајќи на неговата нова улога.
Компанијата имаше повеќе од 7.000 вработени на крајот на 2021 година, според регулаторното поднесување, а една четвртина од бројот на вработени изнесува речиси 2.000 вработени.
Извештаите дека Маск планира да намали значителни делови од работната сила на компанијата за социјалните медиуми се вртат со недели. „Вашингтон пост“ претходно објави дека Маск им рекол на потенцијалните инвеститори дека планира да елиминира речиси 75 отсто од персоналот на Твитер во обид да си поврати дел од сумата што ја плати при купувањето на компанијата.
Извор: Гардијан