Попладнево, околу 18 часот на телефонскиот број 192 се јавил маж кој се заканил дека со две ракети, ќе го уништел објектот на Владата, информираат од МВР. Од таму додаваат дека лицето кое се заканувало е пронајдено и е однесено во полициска станица.
„Во 17:40 часот на телефонскиот број 192 од мобилен телефон се јавил маж во видно алкохолизирана состојба и без да се претстави рекол дека „за 16 минути две ракети ќе бидат испалени кон зградата на Владата на Република Македонија за да ја уништат“. МВР веднаш постапи и ги презеде сите оперативно тактички мерки. Пронајден е мажот кој се јавил на 192 и однесен во полициска станица, каде објаснил дека неговото јавување било мотивирано затоа што, како што рекол, „сакал да привлече внимание затоа што не бил задоволен од функционирањето на системот во државата“. Имено, во текот на денешниот ден, тој бил приведен во полициска станица за друго дело, за кое, според негово тврдење не бил виновен. Се преземаат соодветни дејствија за расчистување на случајот, а известен е и јавен обвинител“, пишува во соопштението на МВР.
Претходно Стејт департментот преку соопштение на Фејсбук, ги предупреди своите граѓани да избегнуваат да се движат во пределот на владата, на булевар Илинден.
„Американската амбасада во Скопје ги предупредува своите граѓани да избегнуваат да се движат во близина на објектот на владата на Македонија, која се наоѓа на булеварот Илинден. Министерството за внатрешни работи предупредува дека постојат можности за инциденти во таа област, напишаа од Стејт департментот“.