На Кожното одделение, но и на други оддели во болницата„8 Септември“ им се заканува опасност од затворање бидејќи нема доволно медицински сестри за нормално да се извршува работата. НОВА дознава дека медицинските сестри од Кожно одделение  потпишуваат  петиција со која му поставуваат ултиматум на директорот дека „доколку не се вработат уште медицински сестри тие колективно ќе си заминат од болницата“.  Образложението кое написмено ќе го достават до директорот е дека не можат да издржат толкав обем на работа и чести дежурства. Директорот  Сашо Стојчев за НОВА потврди дека во болницата се потребни 200 нови медицински сестри, не вклучувајќи ги тука лаборантите, физиотерапевтите и рентген техничарите. Но за да се ублажи состојбата, тој вели дека  може да се почне со 60 нови вработувања на медицински сестри.

„Немаме медицински сестри кои ќе работат попладне. Ќе мора да затвориме некои одделенија во болницата доколку вака продолжи работата. Во докторите и медицинските сестри во кожното одделение се уморни. Таму има 10-15 болнички и уште толку амбулантски кревети, така што имаат доста работа“, изјави за НОВА Стојчев.

Тој потенцира дека очекува да биде повикан на средба во Министерството за здравство за да се види со каков и колкав капацитет се располага, што се планира,  и како што рече, се надева дека за проблемот ќе се разберат како што треба.

Од  Министерството за здравство нема одговор на прашањето на НОВА, што планираат да преземат за да се ублажи состојбата во болницата за да не дојде до затворање на некои одделенија.  Што се случува со новите 350 вработувања што ги најави министерот Тодоров? Иако Тодоров изминатиот период тврдеше дека  конкурсите се во тек, а болниците можат да распишуваат огласи бидејќи самите се должни да им обезбедуваат плати од сопствените буџети, сепак директорите тврдат дека тоа е невозможно додека не добијат согласност, од Министерството за финансии.

„Доколку не добиеме финансиска согласност не можеме да распишеме конкурс, ниту да ги пријавиме луѓето во Агенцијата за вработување. Тоа е кривично дело“, тврдат директори на болници за НОВА.

За познавачите на проблематиката, нејасно е како Министерството за здравство бара од болниците да распишат огласи, а со тоа ги тера да прават кривично дело. Дали е можно една ваква институција да не ги познава законите или новите 350 вработувања се само политички маркетинг.  Од Министерството засега молк иако пред годишните одмори на големо ги најавуваа новите вработувања.

За тоа време Болницата „8 Септември“се снаоѓа со преземање и префрлање на медицински сестри од еден оддел на друг. Но, не знаат до кога ќе издржат така, со оглед на тоа што имаат зголемен обем на работа, а најголем дел од пациентите од државата се праќаат во болницата. Само во првите шест месеци од годината во болницата имало 9672 хоспитализирани пациенти, за разлика од лани кога за цела година имало 6500 пациенти. Досега имало 150 000 амбулантски прегледи, потврдуваат од болницата. Ситуацијата станува уште поалармантна  бидејќи има огромен одлив на медицинските сестри кои забрзано учат германски јазик и заминуваат на работа во Германија или други европски земји.