Лидерот на опозициската Републиканска партија во Албанија, Фатмир Медиу оцени дека состојбата во правосудниот систем во земјата е без преседан. Во обраќање пред Собранието на партијата, тој се повика на состојбата во Врховниот и во Уставниот суд што подолг период не функционираат поради тешкотиите во процесот за проверка на потеклото на имотот на судиите и нивна вмешаност во криминални активности. Затоа даде оценка дека состојбата во Албанија е полоша од било која европска земја.
„Повеќе од една година немаме Уставен суд како ниедна друга европска земја и целата моќ на овој суд е узурпирана од мнозинството и од премиерот. Нема никаков филтер за уставноста на законодавството во Албанија. Повеќе од една година сме без Врховен суд и денес има околу 30.000 неразгледани предмети со што отворено се кршат правата на граѓаните“, посочи Медиу.
Според него актуелната состојба во Албанија е алармантна, организираниот криминал ја заробил државата, а младите се принудени да ја напуштаат земјата.
„Албанија и албанската нација се наоѓаат на крстопат и критичните случувања што се создадени од политиката на власта која ја задави нашата европска иднина. Кога Европа ги кажува проблемите што ги имаме, што во суштина се многу посериозни од она што го велат, за премиерот Европа не нè разбира и прејудицира“, истакна Медиу кој ја обвини Владата за тешката економска состојба, за сиромаштијата, за непочитување на правата на граѓаните.
Тој се осврна и на протестите на жителите од населбата „Астир“ чии домови треба да се урнат поради изградбата на големата обиколница во Тирана и побара од премиерот Рама да ги обесштети граѓаните според пазарна вредност.
„Денес не сме уставна Република туку банана Република. Рама вети легализирање на секој бесправно изграден објект, а од друга страна сега кон нив се обраќа со навредливи зборови. Владата треба да ги обесштети според пазарна вредност“, наведе Медиу.
Актуелната влада на чие чело е премиерот Еди Рама, според Медиу, е најантиалбанска и најантиевропска во текот на транзицијата.