Владата на Никола Груевски за реклами и пропаганда во медиумите од 2008 до 2015 година потрошила 38 милиони евра.

Како што информира портпаролот на Владата Миле Бошњаковски на прес конференцијата, се работи за кампањите за трето дете, против абортус, Истражи ја Македонија, Ден на дрвото, Денови на храна и други. Тој потенцира дека во оваа сума не се внесени потпрошените пари од буџетот за оваа намена за 2006, 2007 и 2016 година, бидејќи не се пронајдени документите.

Овие 38 милиони евра, како што презентираа од Владата се потрошени на:

-23 милиони евра за закуп на време за реклами во електронските медиуми во Македонија;

-15 милиони евра за продукција на кампања, уплатена на неколку маректинг агенции, а во кои се вклучени и парите за закуп на огласи во печетаени медиуми;

-200 илјади евра за  истражување на јавно мислење, но се уште не се анализирани сите документи.

Како еден од најфлагрантните примери на трошење на буџетски пари за рекламирање , Бошњаковски го истакна плаќањето извршено на 24. 12. 2008 година, кога во еден ден на неколку телевизии со национална концесија се префрлени 2 милиони 125 илјади евра, како и уплатата од 30.000 евра на агенција за конуслтатнстки услуги за само еден месец.

Не постоеле критериуми на основа на кои се префрлани парите за закуп на простор за рекламирање кај националните телевизии.

Бошњаковски рече дека на прв поглед може да се каже дека тоа е рејтингот на гледаност, но бројките покажуваат дека тоа не е случај и ги даде следниве примери, при што телевизиите ги нарекуваше со шифри, без имиња, поради како што рече предизборната кампања:

-На телевизијата со шифра 11 и се префрлени 7 милиони евра. Нова телевизија која се појавува во 2012 година со национална концесија под шифра 33 во документите, во втората година од функционирањето и се префрлени половина милион  евра од владата на Груевски, наспроти телевизија која со години работи со национална концесија и добила само 22 .000 евра истата година, рече Бошњаковски.  Критериуми немало ни при распределбата на средствата з арекламирање во регионалните и локалните медиуми.

Но она што е забележително кај овие медиуми, е дека интересот на владата  на Груевски за рекламирање кај нив се појавува од 2014 година наваму, додека претходно за нив или не се издвојувало ништо, или најмногу до 100 евра. Тие сега добивале и по 15.000 евра.

Бошњаковски истакна дека оваа влада ја прекинала оваа појава, дека веќе нема да се плаќаат реклами во медиумите и Владата веќе нема да биде најголем огласувач во земјата.

ВМРО ДПМНЕ реакција

Се е по закон и нема ништо незаконски, сите средства, до последниот денар се распределени по прецизна методологија и доделени низ транспарентен процес, реагираат од ВМРО ДПМНЕ на изнесените информации на прес конференцијата на владиниот портпарол Миле Бошњаковски, за потрошените 38 милиони евра за владино реламирање, кампањи и пропаганда.

-Ваквата напумпана и манипулативна прес конференција е беспредметна, бидејќи информациите за кампањите и за средствата доделени на медиумите беа претходно јавно објавени уште пред две години. Очигледно е потребата за евтин сензационализам, страв од пораз и дефокусирање на јавноста и затоа е избран овој период, се вели во соопштението.

ВМРО ДПМНЕ не негира дека се давале пари за рекламирање и кампањи, но како што велат „јавните кампањи на владата имаа едукативна и информативна функција, а епилогот од кампањите донесоа видливи резултати: 100 нови странски инвестиции, подобрен имиџ на државата, дуплиран број на туристи, зголемен број на патници“.

Отворањето на темата за кампањите и средствата исплаќани на медиумите преставува обид да се избега од вистинските скандали поврзани со тендерите на актуелни владини функционери.