Меѓународниот комитет на Црвениот крст соопшти дека „итно е потребен итен и непречен хуманитарен пристап“ до опколениот украински град Мариупол. Во соопштението за печатот пред малку, Црвениот крст рече дека е „длабоко вознемирен од ситуацијата во Мариупол, каде на населението му е очајно потребна  помош“.

Руските сили продолжија да го напаѓаат градот и денеска, изјави украинскиот капетан Свјатослав Паламар во велигденската порака. Војниците на Азов – првично формирани како националистички волонтерски баталјон, но потоа претопени во украинската војска — продолжуваат да даваат отпор во опколената фабрика Азовстал. Украинските власти проценуваат дека 100.000 цивили бараат евакуација од разурнатиот град.

„Итно е потребен непречен хуманитарен пристап за да се овозможи доброволно безбедно поминување на илјадници цивили и стотици ранети надвор од градот, вклучително и од областа на фабриката Азовстал“, апелира Меѓународниот комитет на Црвен Крст.

МКЦК направи неколку обиди да евакуира цивили од градот но еден од нивните тимови беше приведен во текот на ноќта од полицијата при обид да стигнат до градот. Откако тимот беше ослободен, портпаролот на МКЦК рече дека инцидентот покажал „колку е нестабилна и сложена операцијата за олеснување на безбедниот премин околу Мариупол за нашиот тим“.

„Секој ден, секој час што минува има ужасна човечка цена“, нагласи МКЦК во денешната порака, додавајќи дека „се подготвува“ да им помогне на страните во конфликтот да се договорат за доброволни аранжмани за евакуација.

Нашите тимови „се поставени за да ги олеснат операциите за безбедно поминување веднаш штом ќе се постигне таков договор и ќе се обезбедат безбедносни гаранции“, порача Црвениот крст. (Си-Ен-Ен)