Британскиот Парламент ќе гласа за договорот за Брегзит на премиерката Тереза Меј пред 21 јануари, соопшти денеска нејзиниот портпарол.
Гласањето требаше да се одржи денеска, но Меј вчера соопшти дека гласањето е одложено и побара дополнителна потврда од ЕУ дека гласањето ќе помине во Парламентот.
Британската премиерка настојува што е можно побрзо да го реши застојот во договорот за Брегзит и од европските лидери да добие потврда која и е потребна пред 21 јануари, рече портпаролот.
Тој исто така додаде дека Меј претходно имала продуктивен состанок со холандскиот премиер Марк Руте со кој се договориле заеднички да ја решат моменталната ситуација.
Меј денеска ќе се сретне со германската канцеларка Ангела Меркел за да разговараат околу приговорите од британски пратеници против предложениот договор.
Претседателот на ЕК, Жан-Клод Јункер денеска пред Европарламентот во Стразбур изјави дека не постои веќе можност за преразгледување на договорот за излез на Велика Британија од ЕУ.
Тој истакна дека е изненаден од последните случувањата, а тоа се најавите на британската премиерка Тереза Меј дека ќе се обиде да ги предоговори условите.
– На крајот од минатиот месец постигнавме договор со британската Влада. До вечер ќе разговарам со премиерката Меј, нагласи Јункер.
Тој изјави дека постигнатиот договор е најдобриот и единствено можен.
– Нема простор за предоговарање, единствено постои можност за појаснување и толкување, но без преразгледување на текстот. Тоа треба да им биде јасно на сите, додаде претседателот на ЕК.