Британската премиерка Тереза Меј предупреди дека во случај на долго одложување на Брегзит, Велика Британија ќе треба да учествува на европските избори во мај и тоа ќе биде „брилијантен симбол на колективниот пораз на Парламентот“.

Во авторска статија објавена во „Сандеј Телеграф“, Меј додава дека ако британските пратеници не го поддржат нејзиниот договор за Брегзит пред средбата на Европскиот совет во четврток, земјата „нема да ја напушти ЕУ со месеци, ако некогаш воопшто и ја напушти”.

Во новата недела се очекува британската премиерка да се обиде по третпат да добие одобрение на парламентот за нејзиниот договор.

Британската влада сè уште нема поддршка од доволeн број на пратеници за „победа“ за Брегзит, но „значителен број” пратеници се преиспитале и веројатно ќе го поддржат документот, рече британскиот министер за финансии, Филип Хамонд. По она што се случи во вторникот, извесен број колеги го сменија мислењето, нагласува тој.