Лидерот на ДПА, Мендух Тачи и Силвана Бонева, поранешен пратеник на ВМРО-ДПМНЕ и член на Државната изборна комисија пристигнаа во СЈО, каде беа повикани да дадат изјави.
Засега нема официјални податоци во какво својство и за кои предмети се повикани овие функционери во СЈО.
На дневната агенда на СЈО денес е и претседателот на ПЦЕР, Самка Ибраимовски.
Партијата на Ибраимовски потврди дека е повикан како сведок. Според нивни сознанија се работи за изборни измами и дискриминација по етничка припадност, што произлегуваат од прислушуваните разговори кои се предмет на истрагата.
Ибраимовски ќе сведочи и за изборите во Шуто Оризари во 2011 година, каде што според бомбите од опозицијата власта му подготвувала местенка.
Специјалната јавна обвинителка Катица Јанева претходно во писмена изјава до медиумите најавува дека во следниот период ќе има зголемена фреквенција на лица во Специјалното обвинителство.
„Во периодот што следи ќе има зголемена фреквенција на лица во ова Јавно Обвинителство. Согласно ЗКП лицата кои се повикуваат ќе бидат од корист со нивните сознанија за разјаснување на околности по повод сите постапки кои се отворени во овој период. Постапките се однесуваат на досега објавените и необјавени неовластено прислушкувани разговори. Заради тајноста на предистражната постапка, поконкретни детали нема да се откриваат.“, се вели во соопштението на СЈО.