Поранешниот американски претседател Доналд Трамп денеска ќе се појави на суд каде што ќе биде информиран за обвинението, ќе му биде земен отпечаток од прст и фотографиран за архивата и ќе се изјасни во историскиот случај за САД, јавуваат медиумите ширум светот.
Трамп беше обвинет минатата недела, станувајќи првиот претседател или поранешен претседател кој се соочи со кривична пријава, поради исплата на порно ѕвездата Сторми Даниелс во 2016 година за нејзиното молчење за нејзината врска со Трамп. Трамп тврди дека е невин и ќе се изјасни за невин на суд.
Пред кулата Трамп во Њујорк и пред судницата има силни безбедносни мерки пред појавувањето на поранешниот американски претседател пред судот.
Се очекува Доналд Трамп да пристигне во судот на Менхетен околу 6:30 часот по локално време, или 12:30 часот по наше време.
Политичкото движење „MoveOn“ постави големи постери на автопатот што води до имотот на Трамп на Флорида, Мар-а-Лаго, на кои пишува „Трамп не е над законот“ и „Толку многу го мразам Трамп“ .
Адвокатите на Трамп се спротивставија на видео, фотографирање и радио емитување на сослушувањето, велејќи дека тоа „ќе ја влоши веќе речиси циркуската атмосфера околу овој случај“ и ќе го намали достоинството и пристојноста на постапката.
Судијата Хуан Мерчан доцна синоќа одлучи дека на пет фотографи ќе им биде дозволено во судницата пред сослушувањето да снимаат неколку минути, а камерите ќе бидат дозволени во ходниците на зградата.
Окружниот обвинител Алвин Брег, демократ, кој ја водеше истрагата, ќе одржи прес-конференција по сослушувањето.
„Мораме да ја вратиме нашата земја и да ја направиме Америка повторно голема!“, напиша вчера Трамп на својот профил на социјалната мрежа „Вистина“ веднаш по пристигнувањето во Њујорк од Флорида, повикувајќи ги поддржувачите да донираат за неговата кампања.
Во текот на викендот, полицијата почна да поставува барикади во близина на кулата Трамп, каде што Трамп спиеше во својот стан по пристигнувањето од Флорида, и пред Кривичниот суд на Менхетен, бидејќи денес се очекуваат протести на двете места.
Градоначалникот на Њујорк ги предупреди потенцијалните демонстранти да се однесуваат пристојно. „Нашата порака е јасна и едноставна: контролирајте се. Њујорк е нашиот дом, а не игралиште за вашиот погрешен гнев“, рече Ерик Адамс.
Запрашан дали е загрижен за можни немири, претседателот Џо Бајден, демократ од кој нашироко се очекува да се кандидира за реизбор и да се соочи со Трамп, рече: „Не, јас верувам во Њујоршката полиција“.