Помина времето кога владееше довербата, изјави Ангела Меркел на митинг во Минхен, мислејќи на довербата помеѓу евро-атлантските сојузници.
Од доаѓањето на Доналд Трамп во Белата куќа, односите помеѓу Европа и САД се наоѓаат пред сериозен предизвик. Патувањето на Трамп во Европа минатата недела тоа и го потврди.
«Времето кога можевме тотално да сметаме едни на други е речиси завршено. Тоа го видов во последниве денови», рече германската канцеларка.
Таа додаде дека «ние, Европјаните, мораме да ја земеме нашата судбина во наши раце; мораме да се бориме за нашата судбина».
Изјавата на Меркел дојде до самитот на групата Г7 (Германија, Франција, Италија, Јапонија, Канада, САД и Велика Британија) во Таормина во Италија. Лидерите на овие земји од средбата излегоа разочарани. Трамп одби да се обврзе дека ќе го прифати и примени климатскиот договор од Париз.
Освен климата, втор проблематичен момент за ЕУ беа изјавите на Трамп на самитот на НАТО во Брисел. Тој одби исто така да се заложи за заедничката одбрана.
Покрај тоа, Трамп во два наврати ги оквалификува трговските односи САД-Германија како «лоши, многу лоши».