„Коалиција на губитници“ е името со кое во Германија веќе се нарекува владата која Ангела Меркел се подготвува да ја води во својот очигледно последен мандат.
Конзервативците на канцеларката од ЦДУ/ЦСУ и социјалдемократите (СПД) по маратонски преговори вчера постигнаа договор за почеток на формални коалициски преговори, со што се зголемени изгледите за составување на нова германска влада и излез од политичката блокада.
Договорот овозможува почеток на детални преговори за коалициски договор следните недели, а со тоа се завршува периодот на неизвесност, кој ја ослаби меѓународната позиција на Германија и го отвори прашањето дали Меркел може да остане на својата функција.
Германскиот политиколог, Крал-Рудолф Корте, за германската телевизија ЗДФ рече дека од големата коалиција останала мини-коалиција која претставува само 53 отсто од гласачите по парламентарните избори, додека во претходниот Парламент ЦДУ и коалиционите партнери од ЦСУ и СПД заземале две третини од местата. Но, на последните избори, традиционалните партии се казнети. Канцеларката победи, но со еден од најлошите резултати (33 отсто), додека СПД падна на 20,5 проценти.
Причината за тоа е продор на крајната десница со речиси 13 проценти и враќањето на либералната партија исто така со десна програма. Неделникот „Дес Шпигел“ неодамна иронично искоментира „палео-коалиција“ која ја сочинуваат партиите и лидерите кои се слични на диносауруси.
Тројцата претседатели на партиите кои вчера преговараа се ослабени и однатре. Мартин Шулц не се опорави по дебаклот на парламентарните извори, а Хорст Сеехофер во ЦСУ го маргинализираа неговите внатрешни противници.
Иако на видик нема сериозен наследник на канцеларката на интернет се дебатира за период после Меркел. Германското општество е силно, но канцеларката изгуби политички поени по бегалската криза. Се наметнува прашањето дали таа ќе го доврши својот четири годишен мандат. Поголемиот дел од Германците (56 проценти) во минатонеделното истражување рекоа дека ќе може.