Апелацискиот суд го објави денеска решението со кое му го укина притворот на Сашо Мијалков, поранешниот шеф на УБК и му определи поблаги мерки на претпазливост со понудена гаранција во вредност од над 11 милиони евра.
Судиите и наложуваат на Агенцијата за катастар на недвижности да се стави по хипотека имотот со кој Мијалков гарантира дека ќе биде достапен на судот и тоа станови, деловни објекти, хотелски апартмани, бензинска станица и земјиште.
По жалбата на Мијалков, како што пишува во решението, одлучувал трочлен совет составен од судите Тања Милева, претседателка на советот, Енвер Беџети и Ѓоко Ристов, членови на советот.
По оценка на овој совет, се вели во решението, основани се жалбените наводи на обвинетиот дека првостепениот суд при донесување на обжаленото решение погрешно утврдил дека понудената гаранција не преставува вредносно обезбедување на присуството на обвинетиот во текот на постапката.
– Не е спорно дека кривичната постапка е во тек и дека се уште е потребно обезбедување на присуство на обвинетиот со цел да се спречи истиот да се даде во бегство, што преставува основ за мерката притвор, но со оглед на околностите дека идентитетот на обвинетиот е утврден и познат, има оформено потесно семејство, родител е на две деца, а во корелација со висината на определената гаранција, советот на овој суд цени дека погоре наведените околности преставуваат вредносно обезбедување за присуство на обвинетиот во понатамошниот тек на кривичната постапка, се вели во образложението на Апелацискиот суд.
Откако во јавноста беше обелоденета одлуката на апелациските судии, Кривичниот суд на барање на обвинителството му определи нов притвор на Мијалков за случајот „Плацеви на Водно“, а министерот за правда Бојан Маричиќ побара од Судскиот совет да испита по која основа судиите ја донеле одлуката за притворот.
Тој ги прозва судиите од Апелацискиот суд во Скопје Ѓоко Ристов и Енвер Беџети да `и објаснат на јавноста како ја донеле одлуката и на кој начин ќе ја преземат одговорноста ако се случи обвинетиот повторно да избега.
С.М.