Поранешниот директор на УБК Сашо Мијалков денеска е спроведен од затворот од Струга во Кривичниот суд на судење за случајот „Титаник 2“. Тој во струшкиот затвор ја издржува тригодишната казна од случајот „Империја“, јави МИА.
Кривичното гонење за тоа дело застарува за четири месеци, односно во април 2022 година.
Случајот е во фаза на доказна постапка по вторпат, откако во декември 2019 година Апелацискиот суд Скопје ги укина затворските казни што ги изрече Кривичниот суд.
Мијалков се гони за противзаконско влијание за изборните нерегуларности во 2013 година.
Кривичниот суд во 2019 го осуди поранешниот директор на УБК, Сашо Мијалков за примање награда за противзаконито влијание.
Според обвинението на СЈО, Мијалков преку лидерот на ДПА, Мендух Тачи, нарачал да му наложи на сопартиецот од ДИК, Бедредин Ибраими, да гласа за поништување на регуларно гласање во избирачко место во Струмица, во корист на Васил Пишев од ВМРО-ДПМНЕ, на штета на тогашниот кандидат за градоначалник, Зоран Заев. Во декември истата година Апелацискиот суд ја укина пресудата поради повреди на процедурата и случајот го врати на повторно судење.