Ако работите останат исти, името на премиерот не е толку важно. Граѓаните ни кажаа – вака не треба да се работи, треба да менуваме нешто во начинот на работа. Ако останат работите исти, тогаш нема причина да си дава оставка. Сметаме дека неговиот чин значи дека сака да се трансформира СДСМ и Владата, рече Милевски.
Ќе има нова влада сега, премиерот си даде оставка, значи Владата е во оставка. Не може да си замине премиерот, а да останат министрите, бидејќи тие се на предлог на премиерот. Ќе има нова влада која ќе биде избрана во Собранието, изјави претседателот на ЛДП, Горан Милевски, гостувајќи во Утрински брифинг.
Заминувањето на Заев, вели Милевски, е дефинитивно и тука нема сомнеж.
– Тоа е еден морален чин кој јавно го изнесе и од партијата и нема тука што да дебатираме на таа тема. Ја донесе таа одлука, тоа го знаевме, бидејќи ни го најави уште по првиот круг. Знам дека навистина тоа го мисли и тоа ќе го реализира. Доволно го познавам за да знам дали е тактика или искрено негово мислење, истакна Милевски.
Тој додаде дека името на новиот премиер е отворена тема и дека Заев истакнал дека ќе го слушне мислењето на коалиционите партнери.