Министерот за животна средина и просторно планирање, Насер Нуредини, вчера и денеска заедно со претседателот Стево Пендаровски учествува на Светскиот лидерски самит, во рамките на климатскиот самит #COP26 во Глазгов, каде заедно со лидерите на државите во светот се презентираат националните климатски амбиции и акции, информираа од Канцеларијата за комуникација на Министерството за животна средина и просторно планирање.

Во повеќедневната програма на климатските преговори, Министерот Нуредини ќе учествува и на различни тематски настани, каде беше поканет да го претстави ревидираниот национално определен придонес на Република Северна Македонија, препознаен како еден од поамбициозните ревидирани придонеси кон Договорот од Париз. Со овој придонес нашата земја се обврза за намалување на емисиите на стакленички гасови од 51% или изразено во нето емисии, во 2030 година, намалување од 82% во споредба со нивоата од 1990 година.

Министерот Нуредини денеска ќе присуствува и на лансирањето на Заложбата за ограничување на емисиите од метан на настанот во организација на претседателот на САД, Џозеф Бајден и претседателката на ЕК Урсула фон дер Лејен, поддржана и од Република Северна Македонија врз основа на претходно анализираните и усвоени политики и мерки во климатските стратешки документи.

На покана на грчката Влада, Министерот Нуредини во попладневните часови ќе се обрати на настанот на високо ниво посветен на заштитата на културното и природното наследство од влијанијата на климатските промени, на кој ќе ги претстави националните студии и напори за конзервација на културното наследство и природни подрачја.