Пред ССМ е собрана група од триесетина лица од кои половината не се ниту членови на ССМ и се пуштени од некои други структури, рече денеска на прес конференција Живко Митревски.

„Обидот за насилен упад во ССМ беше спречен благодарение на функционирањето на правниот систем. Дефинитивно е утврдено дека решението на техничката министерка Ременска било фалсификувано, дека не се спроведувани процедурите и дека не е направена постапка, а 13 од 17 грански синдикати јасно укажаа дека не учествувале нивни претставници, ниту, пак, била направена постапка. Решението е поништено од страна на Министерството за труд и социјална политика и никогаш во Централниот регистар не било избришано името на легитимниот претседател на ССМ Живко Митревски – рече Митревски.

Тој ги обвини претседателите на четирите исклучени грански синдикати од ССМ дека направиле криминал и оти само на име на неплатена членарина во последните две години го оштетиле Синдикатот за повеќе од 15 милиони денари.

Попладнево стотина лица протестираа пред ССМ и бараа разрешениот претседател Митревски да им дозволи да влезат во зградата на синдикатот.

Состојбите во Сојузот на синдикати на Македонија почнаа да ескалираат откако претседателот Живко Митревски беше разрешен од должноста со гласање на претставниците на гранковите синдикати-членки на Сојузот. Потоа Централниот регистер одбиваше да го впише новото раководство на чело со в.д. претседателот Дарко Димовски и покрај решението кое во тоа време го издаде Министерството за труд и социјала под раководоство на Фросина Ременски. Но во четвртокот новиот министер од ДУИ го поништи решението, а ноќта кон Бадник во пет наутро обезбедување најмено од Митревски влезе насилно во просториите на синдикатот и ги избрка синдикалците кои со денови седеа во холот во зградата, а тројца заедно со Димовски завршија во болница.