Граѓани од Центар утрово во своите поштенски сандачиња добиле писмо потпишано од лидерот на ВМРО-ДПМНЕ, Христијан Мицкоски во кое тој им порачува дека е време да го дигнат гласот против актуелната власт и заедно да ја „направиме Македонија, стаменита, силна и непокорна“, објави Фокус.

-Во периодот откако е СДСМ на власт стравот ја замени демократијата, неморалот го замени моралот, а непринципите ги заменија принципите. Корупцијата и криминалот цветаа како никогаш досега, преку ноќ се создадоа недопирливи луѓе, законот не важи за сите подеднакво, рекетот царува. Си поигруваат со човечки судбини, со судбините на убиените деца кај Смилковско, со судбините на семејствата на загинатите полицајци во кумановско Диво насеље. Непотизмот е главна одлика за вработување. Се вработува по партиски клуч. Советници стануваат криминалци и крајно некомпетентни луѓе. Младите се иселуваат негледајќи никаква перспектива, се вели во писмото потпишано од Мицкоски.

Македонија, се истакнува во писмото што го објави Фокус, не е дивоградба која мора да се впише во катастар, а граѓаните имаат идентитет и минато од кое нема откажување.

-Знам дека не ме познавате доволно добро за да речете дека јас сум тој што треба да го поддржите. Јас сум само еден од вас и гледајте го на тој начин. И оттука не треба да ми верувате мене, туку барам да си верувате себеси. Затоа што јас верувам во вас. Не велам дека сме безгрешни и дека нема да грешиме, но ви ветувам дека умееме да се поправиме, се вели на крајот од писмото.