Претседателот на ВМРО-ДПМНЕ, Христијан Мицкоски денеска во Белград, заедно со потпретседателот Александар Николоски, се сретнаа со Претседателот на Република Србија, Александар Вучиќ.
Како што соопштува ВМРО-ДПМНЕ, тие размениле мислења и ставови за повеќе актуелни теми врзани со регионалните предизвици, начините за интензивирање на соработката и стратешките интереси на двете држави.
„Претседателот на ВМРО-ДПМНЕ, Мицкоски посочи дека водењето на добрососедска политика, меѓусебното разбирање и почитување базирано на принципи и вредности преставува трајна добивка за регионот, а за тоа клучни се интензивните контакти и широко подадената рака за пријателство. Мицкоски посочи дека Република Македонија и Република Србија споделуваат повеќе заеднички вредности, но и предизвици поврзани со членството во НАТО и Европската Унија и дека тука е потребна соработка и размена на искуствата како и еден отворен и транспарентен пристап од двете страни“, се вели во соопштението на ВМРО-ДПМНЕ.
Мицкоски посочил и дека, за градење на мостови на соработка, иднината на Балканот е во прогресивните политичари кои умеат да ги заштитат државните интереси и да придонесат за градење на интегрирани општества.
Претседателот на ВМРО-ДПМНЕ го информирал Вучиќ и за состојбата во Република Македонија, при што изразил загриженост за недостатокот на демократски капацитет на Владата за издржан дијалог, опасноста од политичкиот терор кој се спроведувал врз политичките неистомисленици, како и немањето на сериозен концепт за важните прашања од сферата на надворешната политика каде клучно е заштитата на државните и национални интереси.
Мицкоски додал дека наметнувањето на теми како Законот за јазици, немањето на концепт за економски развој, немањето на реформски правец и поразителните економски резултати придонесуваат за слабеење на стандардот на граѓаните, нешто што според него, ја влече државата наназад, и ја оддалечува од стратешките интереси за членство во НАТО и ЕУ.
Мицкоски и Николоски остварија средби и со хрватскиот премиер и лидер на ХДЗ, Пленковиќ, и словенечкиот лидер на СДС и поранешен премиер Јанес Јанша.