Коалицијата предводена од ВМРО – ДПМНЕ својата изборна кампања „Создади нова иднина“ ја претстави во скопските општини Бутел, Аеродром и Гази Баба.
Лидерот на ВМРО-ДПМНЕ вечерва на митинг во Гази Баба пред граѓаните порача дека локалните избори се борба, за како што рече, против корумпираниот систем. Тој пред граѓаните порача дека тој верува во Македонија и нејзиниот народ, за разлика од СДСМ и Зоран Заев, кои според Мицкоски, веруваат во тендери, моќ и пари.
– Ова е борба на идејата во која веруваме и која ја сонуваме, наспроти уривањето на вредностите и кршење на принципите. Тие веруваат во тендери, јас верувам во Македонија и нејзиниот народ. Тие се политиката за моќ и пари, јас сум за да создаваме иднина за сите генерации. Има разлика. Различни сме во моралот, во делата, историјата, и во намерите, истакна Мицкоски.
Кандидатот за градоначалник на Коалицијата предводена од ВМРО – ДПМНЕ за Гази Баба, Бобан Стефковски пред граѓаните вети дека во наредните четири години ќе делуваат интензивно во сите области, а фокусот ќе биде насочен кон економијата на локално ниво и обезбедување на работни места.
– Ќе се насочиме кон значителна модернизација на локалната инфраструктура. Ќе го подобриме образованието и ќе ги унапредиме условите за спорт и рекреација. Екологијата е исто така врвен приоритет, а секако програмата предвидува и проекти за унапредување на здравствената и социјалната заштита, како и за развој на културата и туризмот, рече Стефковски.
Независната кандидатка за градоначалничка на Град Скопје, Данела Арсовска, која е поддржана од ВМРО – ДПМНЕ од Гази Баба вети дека скопјани нема повеќе да живеат во супстандардни услови, да пешачат со километри за јавен превоз или да пливаат по улиците кои се без асфалт, во Скопје мора да се врати надежта дека ако се сака може да се реализираат ветените проекти.
– Ќе бидам личноста која ќе им помага на скопјани и ќе докаже дека е возможно градот да се грижи за нив, за скопјани и граѓаните на Гази Баба ќе видите дека е возможно некој да се грижи за вас, а градот ќе биде достапен за сите, нема повеќе ароганција, ниту безобразни политичари кои не реализираа ништо, рече Арсовска.
Кандидатот за градоначалник од ВМРО-ДПМНЕ за општина Аеродром, Тимчо Муцунски, на митинг пред аеродромци рече дека време е за промени. Тој вети проекти, како што се четири нови градинки, со нула денари трошок за родителите, ново кино, театар, читална, забавен парк, 100.000 квадрати зелена површина, современа, модерна и урбана општина пример за сите, со грижа за сите граѓани, како директна словенска помош за пристап до европските фондови.
– Јас искрено верувам дека со заеднички сили ќе успееме да го направиме Аеродром многу почиста, современо организирана и модерна урбана општина, но и хумана животна средина, во која ќе биде возможно сите жители на целосно рамноправна основа да ги остварат своите права и да обезбедат за себе и нивните семејства достоинствен, пристоен и просперитетен живот, рече Муцунски.
На вечерашниот митинг на ВМРО-ДПМНЕ, во Бутел, кандидатот за градоначалник за општина Бутел, Дарко Костовски, истакна дека Бутел ќе биде безбедна општина, како и гарантираше две нови индустриски зони, два паркови, нова полициска станица и противпожарен пункт и Олимписки спортски центар за нови шампиони.
– Ќе се обидам за општина Бутел да се слушне во целиот регион, како една мала општина во Македонија, напредува брзо, енергично и истата да стане пример за сите останати, посочи Костовски.