Политичар кој се плаши од својот народ треба веднаш да се спакува и да ја напушти политиката. Лидерство се покажува и во добри и во лоши моменти, напиша лидерот на ВМРО-ДПМНЕ, Христијан Мицкоски на својот „Фејсбук“ профил.
Мицкоски го критикува шефот на државата, Стево Пендаровски, бидејќи, според него, тој утре во Крушево, на Мечкин Камен, ќе биде обезбеден од два баталјони полиција без присуство на народ и го обвинува за нанесување цензура на традицијата и на народот.
– Жалам што поради сопствениот страв од соочување со народот, големата лична суета и елитизмот сакате да обезличите настан кој не е на политичарите, туку тоа е настан на народот. Народот кој се борел за Македонија, кој се бори и ќе продолжи да се бори. Вие еден ден нема да бидете Претседател и ќе заминете, ќе Ве паметат по тоа што ќе оставите позади Вас, но ќе Ве запаметат и по оваа кукавичка одлука да му го одземете на народот чествувањето на жртвата на Илинденците, пишува Мицкоски на „Фејсбук“.
Тој јавно го советува Пендаровски да ја преиспита својата одлука за утрешното чествување на Илинден.
– Оставете ја традицијата и обичаите да бидат такви какви што од баба на внук се пренесувале. На Илинденците, Македонци, Албанци, Турци, Власи, Роми и останати не им требала лажна политичка порака за обединување, не им треба политички шпалир за да сите до еден го положат својот живот за Македонија, тоа го почувствувале, се прегрнале, Македонец со Влав, Македонец со Албанец со Турчин… и го дале својот живот за својата Македонија. Македонија може и без Вас и без мене и без политичарите, но што сме ние без неа и народот!?, прашува Мицкоски.