Лидерот на ВМРО-ДПМНЕ, Христијан Мицкоски на денешната прес-конференција порача дека партијата нема да оди на предвремените парламентарни избори ако тие се одржат на 5 јули или на предложениот 8 јули, а прв можен датум е средината на јули. Тој го повика претседателот Стево Пендаровски да ја продолжи вонредната состојба, нагласувајќи дека партијата има два услова да учествува на изборите – подготовка на протоколи за заштита на здравјето на граѓаните и услови за фер и демократски инклузивни избори. Нагласи дека еден ден откако во земјата ќе стигне Мисијата на ОБСЕ/ОДИХР може да почне кампањата.
„Имаш време денес до крајот на денот да ја продолжиш вонредната состојба. За зошто да ја продолжи вонредната состојба? – Затоа што ВМРО-ДПМНЕ има два услова, а тоа е најпрво да изработиме протоколи со кои ќе го заштитиме здравјето на граѓаните. Знам дека и тебе ти е тоа приоритет. Од ова кратко време колку што имав можност да те запознаам г. Стево Пендаровски, знам дека и за тебе е тоа приоритет – да изработиме протоколи со кои ќе го заштитиме здравјето на граѓаните. И втората работа е да имаме фер и демократски инклузивни избори во оваа држава. Што значи тоа? – Тоа значи дека првиот ден кога мисијата набљудувачката мисија на ОБСЕ/ОДИХР ќе бидат во Македонија веднаш по одржаната нивна прес-конференција следниот ден нека биде првиот ден од нашата кампања и од тој прв ден да го утврдиме датумот кога ќе бидат одржани овие избори. Според сегашната ситуација она кое што ние како ВМРО-ДПМНЕ и коалицијата „За обнова на Македонија“ го антиципираме, првиот можен датум е во средината на јули“, рече Мицковски.
Тој упати порака и до раководство на СДСМ и до Зоран Заев да не прават притисоци ниту во ДИК, ниту кај граѓаните.
„Ќе ве победиме кога и да се случат тие избори. Ќе ве победиме. Одважете се уште од сега и престанете да го втурнувате народот во една ситуација во која што наместо да нудиме проекти, ќе ги броиме бројот на новозаразените и луѓето кои за жал ќе загубат живот. А, јас, ви ветувам дека по дебаклот што ќе ви се случи кога и да се одржат тие избори ќе имате право на невиност, на пресумпција на невиност, но одговорноста нема да ви бега“, рече Мицкоски.
Синоќа на полноќ заврши вонредната состојба, а откако лидерите на двете најголеми партии во државата владејачката СДСМ и опозициската ВМРО-ДПМНЕ, Зоран Заев и Христијан Мицкоски завчера во Вила Водно не постигнаа договор за датумот за изборите, продолжуваат да течат изборните дејствија за избори на 5 јули. Кампањата, пак, ќе започне на 16 јуни.