Претседателот на ВМРО-ДПМНЕ, Христијан Мицкоски на денешната прес конференција рече дека ги поседува сите искази кои повиканите лица ги дале во Обвинителството за организиран криминал за случајот „Рекет“ и покажа документи за кои тврдеше дека се исказите.
„Свиркачи во ВМРО ДПМНЕ ги донесоа исказите кои што се дадени кај обвинителката која го води предметот „Рекет , наредбите за вештачење и резултатите од вештачењето. Тука моето име го нема, но има имиња на луѓе од власта. Внимателно ќе го набљудуваме развојот на настаните и нема да правиме воајерски шоуа презентирајќи ги овие документи, се додека гледаме дека постои барем минимална објективност во водењето на случајот. Првиот момент кога ќе видиме дека некој сака да ги штити лицата, ВМРО-ДПМНЕ ќе ги објави сите овие документи на увид на јавноста, рече Мицкоски на прес-конференцијата.
НОВА побара одговор од Обвинителството за организиран криминал, но од таму изјавија дека нема да коментираат партиски прес конференции – туку и натаму ќе постапуваат согласно своите надлежности.
Минатиот месец во јавноста беше објавен дел од исказот на Орце Камчев, кој е сведок во случајот „Рекет“. Шефицата на Обвинителството за гонење на организиран криминал Вилма Руковска ја потврди веродостојноста само на првата слика од објавениот записник, но негираше дека во исказот на Камчев биле споменувани политичари.
„Откривањето на доверливи информации од страна на поединци претставува опасност и штета за севкупниот општествен систем и е кривично дело.
Со протекување ваков вид документи се повредува пресумпцијата на невиност, се загрозуваат животи на инволвираните лица и воопшто сe отежнува текот на постапката, рекоа тогаш од Обвинителството и најавија дека ќе истражат како овие документи протекле во јавноста“.
Во меѓувреме, на истиот портал беше објавен дел од исказ кој во Обвинителството го дал друг сведок, но неговата автентичност не се потврди.