Лидерот на ВМРО-ДПМНЕ Христијан Мицкоски во интервју за Дојче Веле одговори на критиката на еврокомесарот Оливер Вархеји дека неговата партија ги поминала основните демократски црвени линии во дејствувањето против францускиот предлог.

„Сметам дека единствените црвени линии кои беа поминати беа тие на распродажбата на македонскиот идентитет, грубата трговија со нашите историски наследства и културни обележја врз кои како народ ја градиме нашата држава и го негуваме нашиот идентитет. Познавајќи ја европската бирократија, го разбирам господинот Вархеји кој како политичар во ЕУ сака уште едно завршено поглавје на своето биро, уште едно затворено прашање. И воедно, јасно ми е дека од негова гледна точка тешко е да се разбере она што за нас е исклучително важно, а тоа е  нашиот идентитет и правото како немногуброен народ да опстоиме“, вели Мицкоски.

Шефот на опозицијата додава и дека Вархеји „треба да сфати дека во ситуација кога никој од Владата не ја консултираше опозицијата при изработка на документот кој беше усвоен како преговарачка рамка, кога целосно беше игнорирана опозицијата и нашите барања јавно да се објави текстот од протоколот каде седат бугарските мегаломански барања, кога се прифати преговарачка рамка по која немаме вистински старт на преговорите туку обична фото-сесија и истите проблеми кои останаа, единствената црвена линија која се помина е таа на здравиот разум“.

На прашањето какви ставови кон тоа прашање покажал унгарскиот премиер Виктор Орбан кој е со унгарецот Вархеји од иста политичка опција, Мицкоски одговори дека Орбан е пријател на Македонија и голем поддржувач на нејзините стратешки интереси.

„Одблиску го запознав со деталите околу преговарачката рамка, и тоа што нам ни пречи, а тоа е правото кое се дозволува на земја членка на Унијата да ги менува нашите учебници, нашиот Устав, да го негира нашиот јазик, а за возврат ние сѐ уште да сме пред портите на ЕУ, сѐ додека некој од Бугарија не рече – доволно е обезличување, сега можете да влезете. Разговаравме и за состојбите во регионот, енергетската криза и ред други теми и прашања. Пријателска и срдечна средба“, изјави Мицкоски.

Околу тврдењата од таборот на социјалдемократите дека Мицкоски е се уште близок со Груевски и дека била заедно и кај Орбан, лидерот на ВМРО-ДПМНЕ вели се тоа смешни обвинувања.
„Таквите дезинформации се и дефокус од реалните теми кои ги интересираат граѓаните, како што е инфлацијата, енергетската криза и асимилација преку прифаќање на протокол кој јавноста го виде откако се потпиша. Можеше да се претпостават реакциите на СДСМ, тие се истите копи-пејст од минатиот пат кога се видов со Орбан. Јасно им е и на тие инсталации позади кои седи интересот на СДСМ, дека доаѓа ВМРО-ДПМНЕ и сега преку ваков или сличен притисок тие инсталации сакаат да фатат приклучок. Тоа е јасен показател дека ВМРО-ДПМНЕ е реструктуирана, реформирана народна партија за македонско национално единство. Додека јас сум претседател ВМРО-ДПМНЕ ќе биде народна партија која ќе се темели на чест, работа и напредок, нема таков полусвет да крои политики во ВМРО-ДПМНЕ“, вели Мицкоски. (С.К.)