Американскиот новинар Дени Фенстер е ослободен од затвор во Мјанмар, објави неговиот работодавец во понеделникот, само три дена откако беше осуден на 11 години затвор за поттикнување кршење на законите за имиграција и тероризам.
Веста на Твитер ја објави Сони Све, издавач на онлајн магазинот Frontier Myanmar за кој работеше Фенстер, без никакви други детали. Друг извор од магазинот ја потврди оваа информација. Околностите за ослободување на новинарот не се јасни.
Портпаролот на армијата на Мјанмар, Зау Мин Тун изјави за „Си-Ен-Ен“ дека новинарот е „ослободен и депортиран“.
Подоцна ќе објавиме детали зошто е ослободен, додаде тој.
Според соопштението објавено од поранешниот гувернер на Њу Мексико и поранешен американски амбасадор во ОН, Бил Ричардсон, кој е во приватна хуманитарна посета на земјата, Фенстер „ќе се врати во САД преку Катар во следниот ден и половина.
Семејството на Фенстер, американската амбасада во Јангон и портпаролот на воените власти во Мјанмар не одговорија на барањето за коментар. Фенстер (37) беше уапсен во мај кога се обиде да ја напушти земјата, која е во хаос по воениот удар на 1 февруари и да го посети семејството во САД.
Според ОН, Фенстер е еден од околу 126-те новинари или медиумски работници затворени поради воениот удар. Околу 47 сè уште се зад решетки.