МНР доцна вечерва ја демантираше информацијата дека не е прифатено барање за агреман за амбасадор на Македонија во Брисел. Оваа реакција дојде откако рано вечерва медиумите објавија информација дека предлогот на Владата за амбасадорка во ЕУ во Брисел да биде испратена Теута Арифи, не го поминал филтерот на ЕУ.
„Министерството за надворешни работи ги демантира шпекулациите кои се појавија во одредени медиуми дека не е прифатено барање за агреман за амбасадор на Република Северна Македонија во Брисел од причини што досега воопшто не е пратен предлог за добивање на агреман до Европската Унија“, велат од МНР. Притоа МНР тврди и дека сеуште нема усогласен предлог на државата за амбасадор во ЕУ.
Ова е вторпат името на поранешната градоначалничка на Тетово да се најде во вести за негативна селекција, а состојбата се комплицира и поради брифирањата од владејачката структура за амбасадорската иднина на Арифи. Претходно беше брифирано дека е предложена за амбасадорка во САД, но не ги поминала филтрите на Стејт департментот во Вашингтон.
Министерот за надворешни работи Бујар Османи на почетокот на март потврди дека Владата одобрила шест амбасадорски имиња, но одби да соопшти за кои личности се работи. Во тој пакет беше и Теута Арифи за амбасадорка во ЕУ – информација која Владата цел месец не ја демантираше се додека вечерва не се појави веста дека Брисел го одбил предлогот.
По наводната мартовската владина одлука тогаш се огласи и опозициската партија Алијанса за Албанците која побара Европската Унија да ја одбие акредитацијата за Теута Арифи.
„Наша должност е, како граѓани на оваа земја и како опозиција, да побараме од ЕУ да ја одбие акредитацијата на Теута Арифи. Нејзината акредитација би била многу штетен сигнал за правдата, бидејќи стекнувањето дипломатски имунитет од страна на Арифи би значело прекинување на нејзините кривични предмети“, изјави Арбен Фетаи, раководител на Одделот за евроинтеграција на Алијансата за Албанците.