Здравствената состојба на двајцата државјани кои вчера и завчера беа извлечени од море е добра, истите се наоѓаат во болница и се очекува нивно брзо пуштање од болница, соопшти Министерството за надворешни работи во врска со драмата со тројцата македонски туристи на Халкидики во Грција.
МНР потврди дека македонските дипломатски-конзуларни претставништва во Грција рано наутро се известени дека продолжува и денеска потрагата со спасувачка акција во полн капацитет- хеликоптер и бродови- како претходните два дена по третиот наш државјанин што исчезна во водите на Егејското море во местото Посиди, Грција.
Нашите претставништва остануваат во интензивен контакт со надлежните институции на Грција и секоја информација навремено ќе биде пренесена, велат од МНР.
Министерството уште еднаш се заблагодари на крајбрежната стража на Грција, грчкото воено воздухопловство и локалното население како и волонтерите вклучени во потрагата, за нивниот неизмерен труд и пожртвуваност во потрагата за спасување на македонските туристи. (Р.Н.)