Министерството за образование и наука (МОН) им наложи на образовните установи да ги одложат планираните екскурзии во Италија. Од нив се бара и во најкус можен рок да обезбедат информации од сите свои вработени, ученици и студенти дали во последните две недели патувале или живеат со некој кој патувал во Ломбардија, Венето, Емилија Ромања и Пиемонт во Италија, но и во Кина, Хонг Конг, Иран, Јапонија, Макао, Филипини, Јужна Кореја, Сингапур и Тајван.
Ова се само дел од детални насоки што МОН ги испрати до училиштата, универзитетите, јавните научни и образовни институции за заштита на учениците, на студентите и вработените од евентуално заболување со коронавирусот по првиот регистриран случај во земјава.
„Лицата кои ќе дадат потврдна информација да не одат на работа и да не посетуваат настава, додека не добијат соодветни инструкции за натамошни чекори што ќе треба да ги направат зависно од ситуацијата и од планот на надлежните здравствени институции и Владата“, информираат од МОН.
Од раководствата на училиштата, универзитетите, јавните научни установи и сите други образовни институции се бара да ја подигнат и хигиената на највисоко ниво во сите простории каде има честа фреквенција на луѓе.