Основното јавно обвинителство за гонење организиран криминал и корупција доби официјално известување од Обвинителството на Кнежевството Монако дека постапило по барањето за меѓународна правна помош во предметот за доделување концесија за центрите за дијализа во Македонија.
Од Обвинителството денеска соопштија дека на надлежниот јавен обвинител, кој е во постојана комуникација со Обвинителството во Монако, ќе му биде испратена целокупната документација поврзана со предметот.
Обвинителството од Монако потврдило и дека судија претседавач на Судот во прва инстанца постапил по барањето за привремено замрзнување на банкарската сметка.
Во рамки на постапката за предметот за доделување концесијата за центрите за дијализа беше утврдено дека правното лице – концесионер на центрите за дијализа е отуѓено.
Финансиските средства од продажбата во износ од 8.281.000 евра беа префрлени на сметка во Монако и Основното јавно обвинителство за гонење на организиран криминал и корупција се обрати до властите во оваа земја со барање за нивно замрзнување, додека 3.275.000 евра се замрзнати на сметки во банки во Македонија.
НОВА на 23 ноември објави дека 11 милиони евра, пари добиени од продажбата на фирмата Диамед Македонија биле префрлени на сметка во Монако, и по барање на Обвинителството за организиран криминал сметките се замрзнати.
Информацијата на НОВА, ја потврдија и од Обвинителството за организиран криминал од каде испратија соопштение во кое пишува дека: Основното јавно обвинителство за гонење на организиран криминал и корупција од оформувањето на предметот во врска со доделувањето на концесијата за центрите за дијализа во Република Македонија, презема низа активности за расветлување на случајот.
Вера Иванова, сопственичката на “Диамед Македонија”, за НОВА потврди дека и се блокирани двете сметки- нејзината приватна во Тутунска банка и втората-странска, која се води на правно лице во Монако.
Иванова тврди дека досега од ниту една институција не е известена зошто и се блокирани сметките, туку тоа го открила кога отишла да го плати данокот.
“Диамед Македонија” на почетокот на месецот беше продадена на шведската фирма “Дијаверум”, a целата работа „букна“ кога Основното јавно обвинителство за гонење на организиран криминал и корупција побара запирање на финансиските трансакции на сметките во Монако.