Во периодот од поништувањето на резултатите од првото гласање на 11.декември до вчерашното прегласување во ИМ 2011 во Теарце ситуацијата беше мирна, без инциденти, освен што беше регистриран обид за поткуп, се вели во прелиминарната изјава на Граѓанската асоцијација МОСТ.
МОСТ го следеше прегласувањето со двајца набљудувачи на самото гласачко место, како и два мобилни тима кои ја набљудуваа ситуацијата околу гласачкото место.
– Прегласувањето помина во мирна атмосфера, со различна динамика во одѕивот на гласачите, кој опадна во последните часови пред завршувањето на гласањето. Во текот на денот беше забележано зголемено присуство на полицијата околу гласачкото место. Околу 9 часот беше забележано дека УВ ламбите не работат, па гласањето беше прекинато во период од 15 минути за да се набават нови, по што истото продолжи. Во понатамошната постапка на гласање и сумирање на резултатите на самото избирачко место не беа забележани нерегуларности.
– Како и на изборниот ден во повеќе општински изборни комисии, така и сега ОИК Теарце се соочи со проблем при составување на записникот бр. 21 за сумирање и утврдување на резултатите од гласањето во однос на лицата кои гласале во казнено-поправните установи. Поради тоа имаше доцнење во објавувањето на резултатите од гласањето. Сам по себе, овој случај ја потврдува потребата од јакнење на капацитетите на изборната администрација во поглед на спроведувањето на комплетниот изборен процес, се вели во изјавата на МОСТ.
МОСТ изразува голема благодарност до сите граѓани кои несебично ги помогнаа напорите на домашно, непартиско набљудување на изборите и кои беа дел од МОСТ, како и до сите поддржувачи кои ја помогнаа мисијата.