Хрватска замина без трофеј од Светското првенство, но и со најдобриот играч на турнирот во Русија. За МВП (најкорисен фудбалер) на мундијалот е прогласен Лука Модриќ. Одличниот играч од средниот ред на Реал Мадрид ги предводеше „коцкестите“ до историски успех на 21. планетарен собир на најдобрите фудбалски нации на планетата.
Тој и соиграчите не успеаја да се реваншираат на „триколорите“ за поразот во полуфиналето пред две децении меѓутоа одиграа седум одлични натпревари и ги освоија срцата на фудбалските фанови ширум земјината топка. Прогласувањето на хрватскиот капитен за најдобар поединец на турнирот, пак, е за континуитет од последните шест СП на кои статуетката за МВП завршуваше во раце на играчи кои не се дел од победничката селекција.
Носители на признанието од шампионатот во Франција во 1998 година се Роналдо (Бразил), Оливер Кан (Германија), Зинедин Зидан (Франција), Диего Форлан (Уругвај), Лионел Меси (Аргентина) и сега Лука Модриќ.
За најдобар млад фудбалер на првенството во Русија е прогласен Килијан Мбапе (19). Францускиот тинејџер од редовите на ПСЖ брилјираше на мундијалот и има големи заслуги во шампионскиот успех на „триколорите“. Воедно се промовира во четврти најмлад учесник во финалните мечеви на завршните турнири додека неговата репрезентација е најмладиот светски првак.
Хари Кејн е најдобар стрелец на Светското првенство со шест постигнати голови, Тибо Куртоа е прогласен за прв голман на турнирот.