Медиа Принт Македонија денеска на вработените им соопштила дека донесена е одлука за откажување на договорот за вработување на 20 луѓе во компанијата. Станува збор за новинари и технички лица од весниците Утрински, Дневник, Вест, Теа Модерна и Спорт, а како што дознава НОВА најголем дел од листата за отпуштање се новинари од стариот состав на Вест.
Од Вест си заминуваат поранешните помошници на уредникот од основачкиот состав Марина Костова и Снежана Ванкова, како и новинарите Орданче Костов, Елица Бучваровска, Бети Тимиовска и Мирослав Илиоски и плус еден возач и дактилографка. Од „новите луѓе“ во Вест донесени по промена на уредничкиот тим, медиумот ќе треба да го напушти само новинарката Ивана Трајковска.
НОВА се обиде да стапи во контакт со главниот и одговорен уредник на „Вест“ – Горан Петрески, кој накусо само рече дека е надвор од земјата.
Со одлуката МПМ соопштиле дека бројот на вработени лица се намалува од деловни причини, бидејќи компанијата е во криза. Во некои од медиумите е намален бројот на вработени, а во дел се укинати и рубрики.
Истакната била и листа на бодување, а одлучувачко за тоа кој ќе добие најмалку бодови и со тоа ќе мора да ја напушти компанијата, од 0 до 50 поени давaл главниот и одговорен уредник, а останатите 50 поени зависат од образованието, стажот, социјалната и економска положба на вработениот.
Отпуштените ќе добијат испратнина во износ од една до пет плати. Дел од вработените кои се на списокот за отпуштање велат дека МПМ внимавала да бидат запазени сите законски процедури, но и покрај тоа тие ќе ја обжалат одлуката.
Најавите на компанијата за отпуштање на десетици вработени и намалување на платите од 10 до 20 проценти уште минатата година, беа причина тимот на „Вест“ точно пред една година да излезе на мирен протест под прозорецот на канцеларијата на претседателот на извршниот одбор на МПМ, Срѓан Керим.
Од канцелариите на МПМ за време на протестот вработени од прозорците ги снимаа и фотографираа оние кои протестираа, но се трудеа да останат незабележани.
Вработените се појавија облечени во маички на кои беше испишан слоганот „Македонија вработува, се бориме за секое работно место“- слоган кој беше дел од владина кампања, иронично пренесувајќи ја пораката до менаџментот и сопствениците на компанијата кои важат за блиски до владејачката партија.
Нивните колеги од „Утрински весник“ и „Дневник“ не излегоа на протестот иако и тие се еднакво засегнати од планираните мерки, со исклучок на новинарката Јорданка Ивановска од „Дневник“која дојде да изрази поддршка.
МПМ ги издава дневните весници „Вест“, „Утрински весник“, „Дневник“ како и други забавни и спортски магазини.
Компанијата доживеа многу турбуленции откако пред неколку години ја презедоа бизнисменот Јордан Камчев и контроверзниот екс дипломат и бизнисмен Срѓан Керим обележан со скандалот „700,000 евра во шише“.
Тие во неколку наврати комплетно ги променија уредничките состави на „Дневник“ и „Утрински“, а годинава и во „Вест“, а беа обвинувани и за отпуштање новинари од идеолошки причини.