Долгогодишниот претседател на Зимбабве, Роберт Мугабе, наводно, одбива да се повлече и покрај се погласните повици за негова оставка.
93-годишниот Мугабе е во домашен притвор од средата, кога војската ја презеде власта.
Војската денеска соопшти дека во тек се разговори со Мугабе и дека се уапсени
“криминалци” околу претседателот, но не објави имиња.
Неофицијално, неколку високи функционери се уапсени од средата.
“Другите се уште се на слобода”, соопшти војската.
Во телевизиска изјава, војската соопшти дека ќе ја извести нацијата за исходот од разговорите со Мугабе “што е можно поскоро”.
Лидерот на опозицијата, Морган Цвангираи, кој по повеќе години се врати во земјата, изјави дека е “во интерес на народот” Мугабе ” да поднесе оставка … веднаш”.
Акцијата на војската уследи откако Мугабе минатата недела го разреши заменик-претседателот Емерсон Мнангагва, што се толкува како отворање пат за својата сопруга Грејс Мугабе за да ја преземе неговата партија Зану-ПФ, а со тоа и претседателската функција.
Медиумите шпекулираат дека доколку претседателот Мугабе биде убеден да се повлече официјално, тоа би ја легитимирало драматичната воена интервенција.
Според изјавите на жителите на Хараре што ги објавуваат светските медиуми, тешко кој сака Мугабе да остане и натаму претседател, но познавачите на ситуацијата во Зимбабве, сметаат дека преговорите за начинот на неговото заминување и некаков преоден договор ќе потрае некое време.