Живко Мукаетов за првпат јавно проговори за срамниот пораз на машката репрезентација во Кожани од Грција во квалификациите за Европското првенство во 2020 година. Претседателот на Ракометната федерација на Македонија (РФМ) ја отвори душата пред членовите на Управниот одбор (УО) и новинарите на последната седница во Скопје. Притоа не поштеди никого (ракометари и стручен штаб) во своето излагање и споделување на горчливите впечатоци од резултатскиот дебакл кај јужниот сосед.
„Поголем срам од Кожани немам доживеано во мојот мандат. Поразот од Грција е потежок и оној од Тунис на квалификацискиот турнир во Гдањск. Виновни се сите кои беа таму. И играчи и стручен штаб. Не правам поделби на млади и возрасни. Но, таму видов евидентна недисциплина, видливо незалагање и злоупотреба на монополот што поединци го го држат на одредени позиции. Тоа е непочитување на федерацијата, кон навивачите и сопствената држава“, нагласи Мукаетов пред членовите на УО.
Победата над Турција во Битола ја оцени како резултат на амбиент, но поуки не се извлекле, па три дена подоцна се случи шокантниот пораз од аутсајдерот во групата, Грција. Па, јавно, пред присутните, се запраша дали вреди да сето тоа што се работи кога нема поддршка од другата страна.
„Срамот од Кожани не може да се избрише, но барем да биде мотивација за она што нè очекува во јануари, а тоа е Светското првенство во Германија“, рече, меѓудругото, Мукаетов.
Селекторот Раул Гонзалез го објави списокот со ракометари на мундијалот во Германија и Данска. Вообичаено, како и неколкупати досега, е проширен со 28 играчи што ќе се филтрираат за време на подтотовките. Собирот е закажан на 19 декември во Скопје и ќе биде во некомплетен состав поради клупски обврски на дел од повиканите. Комплетирањето е најавено за четири дена подоцна (28 декември). Националниот тим ќе темпира мундијалска форма во главниот град, на 4 и 5 јануари е закажан двомеч со селекцијата на Србија и на 9 јануари ќе следува преселба во Германија.
Светското првенство ќе почне на 10 јануари и ќе трае до 27 јануари. Македонија ќе биде дел од групата Б во Минхен заедно со селекциите на Шпанија, на Хрватска, на Исланд, на Бахреин и на Јапонија.
Јапонците ќе бидат прв ривал на македонските ракометари на турнирот (11 јануари, 15.30 ч.), во второто коло е пресметката со Бахреин (13 јануари, 14 часот), во третото е дуелот со Хрватска (14 јануари, 18 ч.), претпоследното го носи судирот со Шпанија (16 јануари, 20.30 ч.) и во последното против Исланд (17 јануари, 18 ч.).