Мемфис Депај и Морган Шнајдерлин може да заминат од Манчестер јунајтед уште во овој преоден рок ако за нив двајца пристигнат добри понуди на „Олд Трафорд“. Ова го потврди лично Жозе Мурињо кој рече и дека нема смета на нив за утрешниот натпревар со Ридинг во ФА купот.
„Ќе ги пуштам ако за нив стигне добра понуда на наша адреса. Во овој момент не ги сметам како опции за првиот тим. Во нормални околности ќе беа во комбинаија за утрешниот меч, но вака не се бидејќи сите чекаме понуди за нив“, рече Португалецот.
Мурињо притоа откри дека за Шнајдерлин и Депај сè уште нема стигнато понуда во клубот.
„Пред неколку недели се изгледаше како извесно дека 100 отсто ќе имаме добри понуди. Денеска, сепак, немам ниту една понуда што е приближна на квалитетот што го поседуваат“, порача предводникот на „црвените ѓаволи“.
Португалскиот стручњак нагласи дека Бастијан Швајншштајгер сака да остане во Манчестер јунајтед и во јануари, најверојатно нема да ја менува средината. Германецот дури може и да стартува против Ридинг како дел од ротацијата на тимот поради густиот распоред што во наредните 19 дена носи 5 натпревари.