До утрово до 8.30 минути, според официјалните информации на МВР, од невремето во Скопје има 15 загинати, 6 лица се водат за исчезнати, а 22 граѓани се повредени и хоспитализирани на скопските клиники.
Најголем дел од жртвите се од Стајковци, Сингелиќ, Смилковци и Арачиново, каде има и најмногу урнати и поплавени куќи, како и уништени возила.
Како што сооштуваат од МВР ноќеска и денеска од МВР се ангажирани Специјалните единици при МВР (ЕБР, ЕСЗ,ПЕП,Единицата за Јавен ред и мир) како и дополнителни служби и тоа : крим техника од Штип, Велес и Тетово, додека пак од останатите служби, ангажирани се Бригадата за против пожарна заштита, Јавното претпријатие Водовод, Дирекција за спасување и заштита, Итна медицинска помош и пајак служба.
Поради настанатите свлечишта кај клучката кај Стајковци према клучката Радишани, по излегување на местото на настанот од страна на полициски службеници, било констатирано дека се заглавени околу 70 возила . Свлечиште било пријавено и на обиколницата на потегот Ѓорче Петров према Стенковец.
Од здравствените служби, интервенирале 12 тима на брза помош за повредени луѓе по невремето што го зафати Скопје.Во текот на ноќта и изутрината имале 65 интервенции на терен во скопскиот регион од кои кај 12 била констатирана смрт.
Според информациите на лекарите укажана им е помош на стотина повредени, пациентите се со скршеници, набиеници и посекотини. Спасувачките екипи успеале да спасат и затрупана жена, која за среќа според информациите на лекарите е со полесни повреди.
Во Ургентниот центар било донесено и мртво осум годишно дете, кое лекарите за жал само му констатирале смрт, а здравствена заштита побарале 11 граѓани. Екипи на Брзата помош, МВР и АРМ како и екипи на центарот за управување со кризи се на терен и работат на расчистување на пустошот што го остави невремето.
Од Градската општа болница „8 Септември“ потврдија дека биле прегледани 24 лица кои имале полесни телесни повреди (контузии и исеченици), и по укажаната лекарска помош се пуштени дома.