По три дена откако НОВА побара одговор од МВР која била улогата на член на обезбедувањето на екс премиерот Никола Груевски на протестите на 20 јуни, стигна објаснување од оваа институција. Во кусото објаснување во дописот од МВР пишува:
„Лицето за кое се однесува Вашето прашање, член на обезбедувањето на поранешниот премиер Никола Груевски, на ден 20.06.2016 во периодот од 17 до 23 часот извршуваше работни задачи кои произлегуваат од работното место на кое е распореден согласно Правилникот за систематизација на работните места во МВР. Имено, лицето раководеше со Одделот за заштита на определени личности и објекти, кој е надлежна организациска единица на МВР за внатрешната и надворешната безбедност на објектите и личностите од витално значење согласно постоечката законска регулатива.“
Сепак пред два дена од МВР за НОВА изјавија дека за протестот на 20 јуни биле ангажирани униформираната полиција, Единицата за брзо распоредување и Единицата за специјални задачи, но не беше споменат Одделот за заштита на личности или објекти, односно т.н. Шеста управа во која работи посоченото лице.
НОВА на протестот на Шарената револуција го „улови“ долгогодишниот бодигард на Груевски, кој цела вечер беше во друштво на началник на Централните полициски служби Сашо Митевски – Хитлер. Тој постојано разговараше на мобилен телефон и известуваше што се случува во секој момент.
Погледнете го видеото кое ден по протестот го објави НОВА, за текот на акцијата на полицијата, како и за заложништвото на МВР од страна на ВМРО-ДПМНЕ.