Милион швајцарски франци, дел од парите од филмскиот грабеж од НЛБ Тутунска банка кој се случи во понеделникот летнале со авион во непознат правец, соопштија од Министерството за внатрешни работи. Од банката вкупно недостигале 2.400.000 швајцарски франци и 645.000 евра.
Како што пишува во соопштението на МВР, осомничениот Б.С. (40) кој сега е во 30 дневен притвор, парите од банката ги извадил во неколку наврати од 6 април – четврток до 10 април – понеделник. Б.С. бил вработен на работно место трезорист во Служба за трезорско работење.
„Првиот износ го затаил од пратка на износ од 1.000.000 швајцарски франци на тој начин што од вкупниот износ пред испраќање на средствата по авионски пат, извадил едно врзопче со 100 банкноти во апоени од 100.000 франци кои ги присвоил за себе. Вториот износ го затаил искористувајќи погодна прилика при што незабележан од никого во неколку наврати првично противправно присвоил 375.000 евра готовински парични средства од трезор, а потоа и 300.000 швајцарски франци кои му биле доверени согласно работните задолженија во НЛБ Тутунска банка. На 10.04.2017 година, соочен со фактот дека е невозможно да изврши раздолжување со настанатиот кусок на парични средства присвоени од негова страна, свесно извршил дополнително присвојување на 2.000.000 швајцарски франци и 270.000 евра од девизниот трезор, при што истите ги ставил во украсна кеса и околу 13 часот незабележан од никого ја напуштил НЛБ Тутунска банка упатувајќи се во непознат правец“, пишува во соопштението на МВР.
Од МВР велат дека врз основа на издадени наредби за претрес на дом и други простории од страна на Кривичниот суд и извршени претреси на локации во Скопје, како и извршени разговори со одговорни лица во НЛБ Тутунска банка АД Скопје и други вработени лица во банката, обезбедени се писмени докази кои укажуваат на свесноста и намерата на пријавениот да го изврши кривичното дело.
„Од извршениот увид во видео записот од безбедносните камери на банката лоцирани и поставени во банката, констатирано е дека пријавениот го искористил процесот на работа и со непочитување на воспоставените процедури за сигурност при работата во трезор, на 10.04.2017 година, во претпладневните часови од девизниот трезор присвоил 2.000.000 швајцарски франци и 270.000 евра, кои парични средства во кеса ги изнел од службените простории и се оддалечил во непознат правец. Од страна на СВР Скопје и во натамошниот период ќе се преземаат мерки за целосно расветлување на кривично правниот настан“, пишува во соопштението на МВР.
Од Основното јавно обвинителство, соопштија дека е издадена Наредба за спроведување истражна постапка против едно лице, како и Наредби за обезбедување на снимките од видео надзорот и комплетната документација од банката, како и за обезбедување на листинзите од телефонската комуникација на осомниченото лице.