Министерот за внатрешни работи, Оливер Спасовски соопшти дека МВР го одбило барањето на претседателот на ВМРО-ДПМНЕ, Никола Груевски, да добие дополнителни 20 телохранители.
Како што кажа Спасовски, по извршените безбедносни проценки, оценето е дека не постојат закани за Груевски и за неговото семејство и затоа бројот на негови телохранители ќе остане на досегашниот, односно 6 телохранители.
Груевски побара зголемување на бројот на телохранители во јули. Тој во барањето навел дека телохранителите ги бара на неопределено време, сè додека има опасности по неговиот живот и личен интегритет, а како причина ги навел неговото безмалку десетгодишно вршење на функцијата кое го правел во турбулентен временски период, како и тоа дека е пратеник во Собранието и претседател на најголемата опозициска партија ВМРО-ДПМНЕ.