Министерството за внатрешни работи попладнево соопшти дека ќе поднесе пријава против пратеникот од СДСМ, Максим Димитриевски, затоа што, според истрагата, тој го предизвикал инцидентот што час по полноќ се случил во кафеаната „Палас“ во Куманово.
Според МВР, извесен З. А., гостин во кафеаната, час по полноќ, телефонски пријавил во СВР Куманово, дека неговиот син В. А. е физички нападнат од пратеникот Димитриевски.
„М.Д. од Куманово, во два наврата, му удрил тупаници во пределот на лицето на В. А., при што му нанел видливи повреди. Полициските службеници од СВР Куманово излегле на местото на настанот и констатирале дека оштетениот со своите пријатели бил гостин во ресторанот и на музиката им порачал одредена песна. Кога музиката престанала, тој се упатил кон оркестарот за да праша зошто запреле. Во тој момент, му се приближило лицето М. Д. Тој, исто така, бил на семејна прослава, и во присуство на повеќе гости, го удрил во пределот на лицето два пати, со што му нанел телесни повреди“, стои меѓу другото, во соопштението на МВР.
Сведоци кои биле присутни за време на настанот, го потврдиле случајот, информираат од МВР.
Утрово, пратеникот Димитриевски за НОВА рече дека бил нападнат од десетина лица кои биле во алкохолизирана состојба.
Димитриевски рече дека напаѓачите прво вербално го провоцирале, а потоа се обиделе и физички да се пресметаат со него.
Пратеникот тврди дека се обидувал да не подлегне на провокациите, но реагирал бидејќи со него била и сопругата.
Димитриевски го пријавил случајот во МВР, и вели иако е обид да биде заплашен, тоа нема да му успее на никого.