Министерството за внатрешни работи на својата официјална веб-страница објави фотографија од лицето по кое се трага, а кое е осомничено дека физички го нападнало пратеникот Горан Милевски на плоштадот „Македонија“ на 25 март .
„Во врска со кривично – правниот настан од 25.03.2018 година случен на плоштад ,,Македонија,, при што физички беше нападнат – пратеник во Собранието на Република Македонија, по извршена консултација со Јавен обвинител, а врз основ на член 561 став 1 и член 563 став 2 од Законот за кривична постапка на Република Македонија, се врши јавна објава на фотографија за едно лице кое што е важно за постапката. За таа цел ги повикуваме сите граѓани кои имаат било какви сознанија за лицето, веднаш да известат во најблиската полициска станица, да пријават на телефонскиот број 192, да ја употребат апликацијата ,,Пријави сомнително лице“ на официјалниот сајт на МВР или да пријават во Јавно обвинителство“, стои во објавата на МВР.
Милевски беше физички нападната од засега непознато лице на 25 март, додека се движел по плоштадот „Македонија“ во центарот на Скопје.
Како што изјави лидерот на ЛДП и пратеник тогаш, лицето без никаков повод и причина му се приближило и почнало да го удира со тупаници по главата.
Милевски за дел од медиумите изјави оти смета дека е можно нападот да бил поради изгласаниот Закон за употреба на јазиците и производ на манипулации врз граѓаните кои не моѓат да ги проценат политичките случувања во Република Македонија, како и неуспешен обид да се попречи патот на земјава кон Европската Унија и НАТО.
Инаку, ова е втор пат МВР преку објавување на фотографија од осомничено лице по кое се трага да бара помош од граѓаните за негово идентификување. Минатата година МВР објави фотографии со замрзнати кадри од снимки од собраниските камери за време на насилствата од 27 април и побара помош од граѓаните за идентификување и пронаоѓање на лицата од снимките.